KALIBO, Aklan — Nag-apela ro nobyo it nag-viral nga Taiwanese tourist sa publiko eabi eon sa mga netizen nga punduhon eon ro pagpakalhit it litrato kara sa social media ag likawan nga mag-share it mga gina-alegar nga unverified information sa internet.
Nagpaathag sa sangka peryodiko sa Taiwan ro owa ginpangaeanan nga nobyo kara sa ginasugid nga matuod nga natabu samtang nakabakasyon sanda sa isla.
Nasayuran nga gin-akusahan it eaeaki ro local media it false reporting, kun sa siin, nagkalhit sigon ro balita sa nagkaeain-eain nga parte it kalibutan .
Suno sa eaeaki nga dapat nga mag-dahan ro publiko sa pag-share nanda it impormasyon bangud nga ro hitabu sigon hay nagtuga it sobrang stress sa karelasyon nga haeos maduea eon sa katinuan tuga it mga negatibong reaksyon.
Ginsaysay pa it eaeaki nga nabakae nanda ro nasambit nga daywang pares it micro string bikini nga kulay puea ag puti sa Boracay mismo, kun sa siin, napierde sa pustaan ro nobya rason nga napilitang isuksok ag irampa sa front beach ag backbeach ro nasambit nga mga swimwear sa magkasunod nga adlaw ko Oktubre 9 ag 10.
Aminado man ro nobyo nga medyu nasobrahan ro suksok it anang nobya.
Ro Taiwanese tourist hay ginpamulta it P2,500 pesos bangud sa pageabag sa Municipal Ordinance No. 203 series of 2003 ukon Taking nude excessively erotic pictures.
