KALIBO, Aklan—Aminado ro Boracay Foundation Incorporation ukon BFI nga bukon it supisyente ro revenue collection it Malay Tourism Office maskin nga nagbukas eon ro isla it Boracay sa mga turista nga taga-Western Visayas sa tunga it ginapangatubang nga pandemya.
Suno kay BFI president Edwin Raymundo, maeaka eamang ro mga turista nga nagabisita sa isla halin kat ginbuksan raya ko June 16, 2020 matapos ro haeos daywang buean nga pagpaidaeom it Aklan sa enhanced community quarantine hasta nga ginbutang sa general community quarantine.
Sa pihak sigon nga ginduea eon it National IATF ro age restrictions sa mga turista hay uwa gihapon it nagarisgo nga magbakasyon bangud sa kahadlok nga makaangkon it virus sa andang byahe maskin nga nagapabilin nga Covid free ro Boracay.
Sa makaron sigon hay maabo eon nga mga establisyimento ro naka-comply it mga requirements nga gintaeana it Department of Tourism (DOT) partikular sa pagsunod sa minimum health protocols agud nga maging eowas ro mga staff ag bakasyunista.
Haom eon sigon ro mga negosyante sa oras nga magbaton ro isla it mga international tourist halin sa mga nasyon nga eowas eon sa nasambitang sakit.
Ginpahayag dugang ni Raymundo nga nagrisgo ro mga negosyante maskin nga uwa it ginakita halin kat nag-eopok ro pandemya.
