Kalibo Aklan ——–May gintaeana eon nga mga aktibidad ro Bureau of Fire Protection para sa nagahieapit nga selebrasyon it Fire Prevention Month sa maabot nga adlaw it Lunes, Marso 1.
Suno kay Senior Fire Inspector Joseph Cadag it BFP-Kalibo paga-umpisahan ro selebrasyon it holy mass sa St. John the Baptist Cathedral pasado alas-6 hasta alas-7 it agahon kung siin pagasundan man raya it motorcade it mga katapo it Bureau of Fire.
Suno kay Senior Fire Inspector Cadag nga magalibot sanda sa bilog nga banwa it Kalibo para magtao it awareness sa mga tawo para makalikaw sa sunog.
Ginkabig ro buean it Marso bilang fire prevention month bangud masami nga mabahoe nga insidente it sunog sa bilog nga Pilipinas ro nailista sa raya nga buean.
Sambilog sigon sa posibleng rason kara hay ro masyadong mainit nga tyempo daea it summer season.
Raya suno kana ro tyempo nga maabo ro nagagamit it elektrisidad agud mabawasan ro init nga nabatyagan pinaagi sa pagbukas it aircon ag electric fan.
Kung maabo ro nagagamit it elektrisidad indi malikawan nga makaangkon it electrical overload kung siin mabahoe ro tyansa nga makaangkon it electrical circuit eabi pa ag may pilang panimaeay nga owa nagasunod sa electrical standard.
Agud mapaeayo sa disgrasya kapareho it sunog, indi pagdueonganon it gamit ro mga kagamitan sa sueod it baeay nga nagagamit it kuryente.
