Kalibo Aklan ————-Mas pang ginpabaskog it Bureau of Fire Protection (BFP-Aklan) ro andang Oplan Paalala, Iwas Paputok” campaign makaron nga holiday season sa idaeum it New Normal.
Suno kay FO2 Alvin Patricio, Information Officer it BFP-Aklan nga ko Disyembre 1 ro andang opisyal nga paglunsar kara kun sa siin hay nakaangkon it motorcade sa bilog nga probinsiya.
Nakatutuk sigon ro andang kampanya makaron pinaagi sa “bandillo” nga ginapatigayon sa tanan nga mga Barangay.
Ginpaathag ni FO2 Patricio nga ro “bandillo” hay ro paglibot it mga fire truck nga may address system nga ginagamit sa pag-anunsyo it mga fire safety tips nga nagatuyo nga masiguro ro proteksyon it publiko sa atubang it mga selebrasyon sa Paskwa ag Bag-ong Dag-on .
Mag-eowas kara, nagapatigayon man sigon sanda it mga inspection sa mga establisimento ag malls .
Bangud sa pandemya, ginalikawan anay it BFP nga magpanupod it mga flyers angot sa fire safety tips sa baylo hay ginpabaskog ro andang anunsyo sa radyo ag social media pinaagi sap ag-post kara sa andang FB account.
Sa pihak nga parte, sa pagpatigayon it fireworks display, kinahangean suno kay FO2 Patricio nga may clearance anay halin kanda .
Sa mga nagabaligya it mga paeupok, sambilog sigon sa mga requirements para sa pagbo-oe it permit hay ro fire safety certificate nga gina-isyu it andang taeatapan kasunod it inspection compliance.
Kinahangean suno nga may fire extinguisher ag signage it “no smoking” ro tanan nga mga stalls.
Ginpaabot man nana nga haeos nagnaba eon ro mga insidente it sunog sa bilog nga Aklan.
