KALIBO, Aklan—Kadungan sa pagdumdum makaron nga buean it Marso sa fire prevention month, nagpatigayon ro Bureau of Fire Protection ukon BFP-Aklan it kauna-unahan nga inter-barangay fire Olympics sa Kalibo pastrana park.
Suno kay senior inspector Arden Bedonia, municipal fire marshall it BFP-Kalibo nga raya hay highlight it pila mga nakalinyada nga aktibidad it BFP-Aklan.
Ro nasambit nga Olympics hay ginpasakupan it limang barangays it Kalibo nga may nabilog eon nga community fire auxiliary group ukon volunteer group, kun sa siin sanda ro makabig nga mga first responder engkaso nga may matabu nga sunog.
Raya hay ginaeakipan it barangay Nalook, Mabilo, Briones, Estancia ag Poblacion nga may siyam nga participants sa kada barangay.
Igaduso sigon nanda nga ro nasambit nga event hay magiging dag-unan eon bangud nga mabahoe raya nga bulig sa komunidad.
Uman nga ginturo sa participants ro firefighting techniques kapareho it water bucket relay, pagtapna it sunog gamit ro fire hose, emergency medical rescue, pag-obra it seat harness, emergency rescue transfer ag iba pa.
Haeos tanan sigon nga participants hay makabig nga winner bangud sa maayos nga execution.
Sa pihak nga parte, nakalista ro BFP-Aklan it tatlong insidente it sunog makaron nga Marso nga ginaeakipan it pagkasunog it truck sa barangay Libertad sa banwa it Nabas; totally burned nga sangka baeay sa diniwid sa brgy. Balabag, Boracay ag partially damaged nga kusina it sangka baeay sa Andagao, Kalibo.
Ginatutukan nanda makaron ro kampanya nga “oplan ligtas na pamayanan” kun sa siin gusto nanda nga haeos tanan nga barangay hay mapaidaeum sa training sa fire fighting ag makabilog it volunteer ukon auxiliary group.
