KALIBO, Aklan–Nakalista eon ro Bureau of Fire Protection (BFP)-Aklan it kapin sa 23 nga mga insidente it sunog umpisa ko Enero 2022.
Suno kay FO3 Mark Alvin Patricio, Public Information Officer it BFP-Aklan nga nakaangkon it sangkiri nga pagtaas sa nailistang insidente it sunog makaron nga dag-on kumpara sa kaparehong period ko 2021.
Bangud kara, uman nga nagpadumdom ro BFP sa publiko nga maging mdahan ag permi nga sikyaron ro mga kagamitan eabi eon ro mga saksakan antes magkatueog para malikawan ro sunog.
Mag-euwas kara, dapat man suno kana nga maging responsable ro mga tawo nga nagapanigarilyo sa pagpilak it mga upos bangud sambilog raya sa ginahalinan it kaeayo kaeakip ro grassfire sa mga kagueangan.
Samtang, dapat sigon nga likawan ro pagkulong sa sueod it banyo engkaso nga makaangkon it sunog sa sueod it panimaeay ag sa baylo hay insigidang mag-adto sa exit.
Madumduman nga nauna eon nga nagpatigayun it aktibidad ro BFP sa mga komunidad agud nga magpakigbahin it mga padumdom sa mga residente para makalikaw sa mga insidente it sunog.
Nasayuran nga ginapatigayun kada buean it Marso ro Fire Prevention Month bangud kaabuan it mga insidente it sunog hay nagakatabo sa rayang buean tuga it masyadong mainit nga panyempo.
