Nakalista ro Bureau of Fire Protection (BFP) Aklan 38 nga fire incident sa probinsya.
Suno kay SFO1 Paulo Vicente Neptuno, hepe it investigation and intelligence section ag special operation section it BFP-Aklan, ro nasambit nga numero hay halin eamang it Enero hasta makaron nga adlaw it Mayo. Raya hay mas manaba kesa sa mga rekord ku nagtaliwan nga dag-on, ag ginapangamuyo nga indi eon raya madugangan pa.
Ro mga nagapanguna sigon nga rason it mga fire related incidents hay may kaangtanan sa kuryente, kapareho it mga naaywan nga nakasaksak nga appliances. May una man suno kana nga mga insidente nga open flames kapareho it pagsunog it basura nga uwa nababantayan nga posibleng mag tuga it grassfire eabi eon makaron nga dry season.
Dugang pa ni SFO1 Neptuno nga masami nga nagatuhaw ro fire related incidents sa agahon ukon sa gabie, kun sa siin uwa eon sa alintro ro mga tawo.
Papdumdum man ni SFO1 Neptuno makaron nga summer season hay papahuwayon ro mga appliances eabi eon ro mga electricfan ag aircons bangud posible rayang mag-overheat ag pwedeng paga-umpisahan it sunog. Bantayan ukon i-check man sigon ro mga saeakyan bangud pwede man rayang mag-overheat ag tunaan it bukon eang it sunog kundi pati eon man disgrasyo sa daeanon.
Samtang, padayon man sigon andang pag conduct it mga inspeksyon sa mga establisyemento eabi eon sa mga high hazard nga mga lugar, ag sa makaron hay may ginapatigayon sanda nga house survey para matumod ro lugar kun makonsidera nga high hazard to fire.
