KALIBO, Aklan–Kasunod it paaeabuton nga okasyon partikular ro Kapaskwahan ag pagsug-aeaw sa bag-ong dag-on, uman nga nagpadumdom ro Bureau of Fire Protection ukon BFP-Aklan sa mga pumueoyo angot sa pwede nanda nga himuon agud nga malikawan ro insidente it sunog ag makaenjoy ro bilog nga pamilya sa kabilugan it selebrasyon.
Panugyan ni fire chief inspector Rowel Limjuco it BFP Aklan nga inde pag-aywanan ro mga ginaeaha sa dapog bangud nga sambilog raya sa makatuga it sunog kon mapabay-an ro kaeayo.
Mag-eowas kara, likawan ro mga octopus electric connection bangud nga posibleng magsiglab ro kaeayo kon mag-overheat ro mga raya kaparehas man sa mga appliances nga napabay-an nga nakasaksak.
Ro LPG hay sikyaron gid kon naka-off ro valve antes nga makatueog bangud nga sa makarundaya nga mga basic fire safety tips hay makapangabuhi it eowas ro bilog nga pamilya.
Samtang sa pihak nga parte, ginaekspektar eon it BFP nga may mga negosyante it paeopok nga magabueo kanda it requirements.
Angot kara, nagapatigayon sigon sanda it seminar and lecture sa mga nagabaligya kon siin dikara nanda ginapahayag ro mga do’s and dont’s kamana man iba pang regulasyon para sa eowas nga pagbaligya it paeopok.
Mag-eowas kara, ginamanduan man ro kada municipal fire marshall nga makipag-angot sa natungdan nga lokal nga gobyerno para masikyar ro kaeowasan it bilog nga pumueoyo it banwa partikular sa pagsug-aeaw it bag-ong dag-on.
