Kalibo Aklan ———-Ginpadumdum it Bureau of Fire Protection (BFP-Aklan) ro publiko nga mag-dahan kontra sa sunog, eabi pa ag nag-umpisa eon ro fire prevention month makaron nga buean it Marso .
Suno kay Fire Chief Inspector Rowel Limjuco, acting provincial fire marshall nga kaeabanan nga nagakatabu ro sunog bangud sa kapabayaan it tawo .
Ro padumdum it BFP hay kasunod it natabu nga sunog sa sangka residential area sa Isla it Boracay kahapon bandang alas-12:25 sa Sitio Bantud, Barangay Manocmanoc.
Apektado sa insidente ro 17 nga baeay kun sa siin 14 ro eubusan nga nasunog ag tatlo ro partially damaged.
May ap-at man nga residente ro nakaangkon it nina ag paso sa nagkaeain-eain nga parte it eawas.
Indi pa sigon masiguro kon sa main line ro rason it sunog, apang ginatantiya nga naga-abot sa masobra sa 2.2 milyon pesos ro kantidad it natupok .
Samtang, gindugang pa ni Fire Chief Inspector Limjuco nga may nagtuhaw man nga sunog sa barangay polo sa banwa it New Washington kahapon pasado alas-5:40 it hapon.
Nasunog ro sangka tree house ag maswerteng owa it naninahan sa hitabu .
Ro sunog hay nagtuga it danyos nga masobra sa 20,000 pesos .
Sa pihak nga parte, dapat suno kana nga ibutang sa isip it mga pumueuyu ro tamang pagdahan agud nga malikawan ro sunog.
Pirmeng i-check ro electrical appliances, LPG, ag mga bagay nga madaling magkaeayo kapareho it mga posporo, lighter ag flammable liquids.
I-check man ag pirmeng limpyuhan ro mga airconditioner ag mga electric fan agud nga indi mag-overheat.
Ginsuhestiyon pa ni Limjuco nga tur-an ro mga miyembro it pamilya partikular ro mga unga sa fire exit it baeay ukon makaangkon it fire drill.
