KALIBO, Aklan — Uman nga nagpanawagan ro Bureau of Fire Protection ukon BFP-Aklan sa publiko nga mag-doble dahan makaron nga nagahilapit ro holiday season eabi eon sa pagbakae it mga Christmas lights ag mga paeupok sa pagsug-aeaw sa Bag-ong Dag-on.
Suno kay SFO1 Felinor Suco, chief operation it BFP-Aklan nga magdahan sa paggamit it nagkaeain-eain nga klase it Christmas Light makaron nga kapaskwahan bangud nga posible raya nga pagahalinan it sunog kun bukon it tama ro proseso sa paggamit ag owa nag-agi sa tamang pag-usisa.
Dapat sigon nga siguraduhon nga nag-agi raya sa pag-usisa it Bureau of Product Standard (BPS) it Department of Trade and Industry (DTI), may nagakaigo nga “label” ro produkto ag may Import Commodity Clearance (ICC) Stickers .
Kadungan kara, kapareho it naka-andan, maga-inspeksyon man ro BFP sa mga igabaligya nga paeupok eabi eon ro ginabawae nga paeupok.
Raya sigon hay ro mga tikang nga andang ginahimo agud nga masiguro nga ro mga negosyante hay nakakasunod sa ginapatuman nga layi ukon Fire Code agud nga makalikaw sa insidente it sunog.
