KALIBO, Aklan–Hugot ro padumdom makaron it Bureau of Fire Protection ukon BFP sa publiko nga maging fire safety conscious ag aware agud nga malikawan ro insidente it sunog sa tyempo it kapaskwahan hasta sa selebrasyon it pagsug-aeaw it bag-ong dag-on.
Ginpahayag ni Fire Sr. Insp. Arden Bedoña municipal fire marshall it BFP-Kalibo nga maangkon eamang raya kon ro tanan hay maging responsable sa andang panimaeay eabi eon ro mga ginasab-it nga christmas lights decoration.
Inde pag-aywanan ro panimaeay nga may mga nakasaksak nga appliances bangud nga posibleng tunaan raya it sunog.
Dapat suno kana nga maging responsable ro kada miyembro it pamilya para malikawan ro insidente it sunog.
Mag-eowas kara, sa paaeabuton nga pagsug-aeaw it bag-ong dag-on hay kinahang-ean nga sa mga gintaeana nga lugar eamang it LGU magpatigayon it pagpaeopok ukon fireworks display para sa kaeowasan it tanan.
Kon pwede suno kana hay likawan eon ro pagpaeopok sa andang panimaeay eabi eon kon mga una sa impluwensya it aeak.
