KALIBO, Aklan–Sa pagsueod it Fire Prevention Month, mas pang ginpabaskog it Bureau of Fire Protection (BFP) ro andang kampanya para malikawan ro sunog.
Suno kay FO3 Joseph Dapitillo it BFP-Kalibo nga halin Marso 1 hasta 20 nakalista eon sanda it daywang insidente it sunog.
Suno kana, una nandang ginrespondehan ro nag-eontad nga sunog sa L. Barrios Street, Brgy. Poblacion, Kalibo matapos ro natabo nga electrical fire kamana man ro nagtuhaw nga grassfire sa Villa Peraz ko nagtaliwan nga adlaw it Biyernes.
Ginkaalarma sigon it mga residente ro hitabo bangud naputos it madamoe nga aso ro pilang porsyon it subdivision.
Ro sunog hay nag-umpisa sa pagsuga it tag-ana it eugta sa anang taeamnan matapos nana nga magpanghawan.
Owa sigon kara ginaeauman ro pag-eapad it kaeayo hasta sa magtuga eon raya it grassfire.
Tatlo sigon ka mga fire truck it BFP-Kalibo ro nagresponde sa lugar ag sa mayad nga swerte hay owa it nahalitan sa nasambit nga insidente.
May kaangtanan kara, ginpaathag man ni FO3 Dapitillo nga may mga ordinansa eon nga nagabawae sa pagsuga bangud sa polusyon nga daea kara sa hangin ag palibot.
