KALIBO, Aklan—Nagbuylog ro Bureau of Fire Protection sa bilog nga nasyon sa ika-ap-at nga parte it Nationwide Simultaneous Earthquake Drill makaron nga adlaw it Huwebes, Nobyembre 11, 2021.
Ginpaathag ni FO3 Paulo Vicente, public information office it BFP-Kalibo nga tuyo it pagpatigayon it maeapnagon nga earthquake drill kada quarter it dag-on nga maka-intigo nga magpahaum ro mga pumueuyu eabi eon ro pagtama it ginatawag nga “The Big One”.
Samtang, nagpanawagan man imaw sa publiko nga seryosohon ag indi pagbalewalaon ro mga drill eabi eon ro pagpatigayon it duck, cover and hold sa pagtunog it sirena.
Kaeabanan suno kana nga naga-panic ro kaabuan kon may linog rason nga maabu ro nahalitan ukon nagakamatay.
Kon nagaguwa suno kana sa building eabi eon sa mga mall, indi magdaeagan agud nga malikawan ro stampede.
Dapat man nga maglikaw sa mga mataas nga mga istraktura kon una sa open field ag magpundo kon una sa sueod it saeakyan.
Samtang, gina-engganyo it BFP ro mga pumueuyu nga magbuylog kara agud nga maging preparado sa pagtama it linog.
Kinahang-ean suno kana nga mabugtaw ro tanan sa importansiya it pagpahaum.
Samtang, sa pangkabilugan, ginpahayag ni FO3 Vicente nga naging madinaeag-on man ro andang ginpatigayon kaina nga earthquake drill.
