Paga-umpisahan it Bureau of Fire Protection ukon BFP-Kalibo ro Fire Prevention Month sa Marso 1 pinaagi sa sangka motorcade it mga fire trucks ag mga empleyado kara.
Suno kay FO1 Jimdel Padalhin, public information officer it BFP Kalibo nga magalibot sanda sa mga nagapangunang karsadahon agud nga mas pa nga mapabaskog ro kampanya sa fire safety awareness it publiko agud nga makalikaw sa anuman nga klase it sunog.
Dugang pa kara nga maabu pa sanda nga mga nakaplastar nga mga programa ag aktibidad kapareho it fire rescuelympics kun sa siin naga-train sanda it mga participants halin sa nagkaeain-eain nga barangay, open house and station tours para sa mga inunga nga nagahamdum nga maging sangka bumbero , road show sa pilang pili nga eskwelahan, tree planting, coastal clean-up, barangay fire Olympics ag iba pa.
Ro barangay fire Olympics sigon hay pagapasakupan it Brgy. Bakhaw Sur, Briones, New Buswang, Caano, Linabuan Norte , Nalook ag Pook.
Angot kara, ginhinyu it BFP Kalibo ro suporta bukon eamang it lokal nga gobyerno kundi maskin ro publiko ag pribadong sektor ro andang mga programa.
Gin engganyo man nanda ro tanan nga sundon ro mga fire safety tips bukon eamang kada fire prevention month kundi sa sueod it bilog nga dag-on agud nga makaangkon it sangka fire free community.
Ro selebrasyon makaron nga dag-on hay nakasentro sa temang “Sa Pag-iwas sa Sunog, Hindi ka Nag iisa!.”
Sa raya man nga tiempo hay igapaidaeum sa red alert ukon full alert status ro BFP.
