KALIBO, Aklan–Nagapadayon pa ro imbestigasyon it Bureau of Fire Protection ukon BFP-Makato sa natabu nga sunog sa sangka hatchery bandang alas-2:00 kaina it aga-aga sa Barangay Baybay, Makato.
Suno kay Punong barangay Ramil Pelayo it nasambit nga lugar nga ap-at nga payag ag sangka kusina ro natigayon nga masunog nga ginapanag-iyahan it sangka Chinese national nga nakilaea eamang sa alyas nga Mr. Lee.
Nasayuran nga haeos tatlong dag-on eon nga naga-tinir sa lugar ro dumueuong nga nakapangasawa it sangka Cebuana ag nakataeana kunta nga maga-umpisa it andang negosyong hatchery it mga alimango ag sugpo sa eugta nga gina-rentahan kara sa pamilya ni Jean Tayco.
Ginatantiya nga naga-abot sa 250,000 pesos ro kabilugan nga danyos it sunog nga ginakabig nga pinakamabahoe nga sunog nga natabu sa nasambit nga barangay.
Nagakanugon man ro Chinese national bangud nga nasunog pati ro andang mga importanteng dokumento nga nakasueod sa vault kaibahan ro cash nga 200,000 pesos nga bag-ong withdraw halin sa banko.
Maskin nga padayun pa nga ginatumod ro ginhalinan it insidente, apang nagapati ro mga tawuhan it Chinese national nga posibleng halin sa sumabog nga LPG ro gintunaan it sunog.
Sa pihak nga parte, ginpahayag ni Lance Tristan fuentes, bayaw it Chinese national nga madasig nga nagkalhit ro kaeayo halin sa kusina bangud nga mag-eowas nga masyadong mabaskog ro hangin hay human sa lights materials ro mga istraktura.
Gindeklarang eon nga fire out ro sunog bandang alas-3:40 it aga-aga.
