KALIBO, Aklan—Nagpadumdum ro Bureau of Fire Protection ukon BFP-Malinao sa tanan nga mga pumueuyu nga magdahan sa sunog sa pagsug-aeaw sa Paskwa ag Bag-ong Dag-on.
Suno kay FO2 Darrel Irabon, public information officer it BFP Malinao nga uman nga ginapadumdum it andang ahensiya nga ugalion nga tan-awon ro mga gamit sa baeay kapareho it mga appliances kun raya hay nakasaksak sa kuryente antes nga matueog ag bugnuton sa pagkasaksak ro mga kagamitan nga indi man kinahangean.
Bantayan man ro mga gina-eaha ag indi basta-basta nga aywan.
Sa pihak nga parte, hugut man sigon nanda nga pagabantayan ro mga nagabaligya it paeupok sa gintaeana nga lugar kamana man ro pag-inspeksyon sa andang mga baligya.
Engkaso suno kana nga may makitang ginabaligya nga mga bawae nga paeupok hay anda raya nga pagakumpiskahon ag pagapapanaugan it multa.
Sa idaeum suno kana it Oplan JDC ukon “Jerry Delivers Christmas” hay nagapatigayon sanda it rekorida agud nga ipaabot sa mga residente, mga opisina ag mga establisimento ro pagahimuon nga pagdahan.
Mag-eowas kara, nagapanupod man sanda it mga torotot sa mga inunga agud nga mabutang sa andang isip nga pwedeng makaselebrar it paskwa ag bag-ong dag-on nga owa nagagamit it paeupok.
Gindugang pa ni FO2 Irabon nga sa banwa it Malinao hay naga abot eon sa ap-at nga retailers it paeupok ro nakabo-oe it permit sa andang taeatapan.
Kadungan kara, nagpanawagan man imaw sa mga magabakae it paeupok nga samtang sa area ro mga raya hay indi magsindi ukon magpanigarilyo agud nga malikaw sa anuman nga insidente.
Para man sa mga nagabaligya kinahangean nga may una raya nga mga tubi ag fire extinguisher agud nga engkaso nga magkasunog sa lugar hay insigida raya nga mapugngan ag matapna.
Padumdum pa ni FO2 Irabon nga indi eon paggamiton ukon sindihan it uman ro mga owa nag-eupok nga paeupok eabi eon ro mga inunga.
