KALIBO, Aklan—Nag-umpisa eon ro kampanya it Buruea of Fire Protection (BFP)-Aklan angot sa andang ginapatigayun nga “Oplan Ligtas Pamayanan ag Oplan Iwas Paputok” para sa nagahilapit nga kapaskwahan.
Raya nga tikang hay para taw-an it igtueopangod ro electrical safety ag firecrackers agud maging euwas ro pagselebrar it Paskwa ag Bag-ong dag-on.
Suno kay FO1 Felinor Suco it BFP-Aklan, nag-umpisa ro andang kampyana angot sa “Oplan Iwas Paputok” ko Disyembre 1 ag magabuhay raya it hasta Disyembre 31 kabulig ro kada municipal fire station.
Nagalibot sigon sanda sa kada banwa ag baryo agud nga magpadumdom sa mga pumueoyo nga maghaeong sa paggamit it mga paeupok agud makalikaw sa sunog ag disgrasya.
Kaangot kara, may pilang banwa eon man suno kana ro nag-apply sa andang taeatapan agud nga mataw-an it permit sa pagbaligya it paeupok.
Kung sa siin, nakalista sanda it ap-at nga retailers sa banwa it Altavas, 13 sa Numancia ag tig daywa sa Balete, Malinao ag Talangan.
Samtang, may una man sigon sandang namonitor nga banwa nga nagpatuman it ordinansa nga bawae magbaligya ukon magpaeupok partikular ro banwa it Buruanga.
Kinahang-ean sigon nga magsunod ro mga retailers sa pilang sueondanan agud nga mapasugtan sandang magbaligya.
Dapat sigon nga siguraduhon it mga raya nga maeayo sa edipisyo ukon gasolinahan ro andang display area kamana man nga may nakabutang nga signage nga bawae mag-sigarilyo ag hugut nga ipagbawae ro pagtesting it mga ginabakae nga paeupok sa sueod it 91.5 meters.
Samtang, kinahang-ean man sigon nga pabaskugon it lokal nga gobyerno ag kapulisan ro pagbantay ag pagpatuman it minimum health protocols agud nga malikwan ro pagkalhit it COVID-19.
