KALIBO, Aklan—Sa pagsueod it “Ber months” nagpadumdom ro Bureau of Fire Protection sa publiko nga maging madahan sa paggamit it kuryente eabi eon sa tyempo it kapaskwahan.
Suno kay FO2 Enrico Nam-ay, arson investigator it Bureau of Fire Protection ukon BFP New Washington nga kaeabanan sa mga naililistang sunog hay bangud sa electrical rason nga importanteng usisaon ag sayuron it mga bumaeakae ro mga standard products sa pagbakae it mga Christmas lights.
Importante suno kana nga mausisa it mga bumaeakae ro PS mark ukon ICC sticker it produkto nga nagapamatuod nga eowas ag nakapasa raya sa pag-usisa it Bureau of Philippine Standards (BPS).
Mag-eowas kara, dapat man nga buhinan ag inde paghimuon nga permanente ro octopus connection bangud nga raya ro masami nga rason it mga sunog.
Ro octopus wiring hay ro sanga-sangang koneksiyon it maabong appliances sa sangka extension nga nagatuga it pag-overheat.
Kadungan kara hay padayon ro BFP sa paglibot ag sa pagpadumdom sa mga residente para makalikaw sa mga insidente it sunog.
