KALIBO, Aklan — Gin-engganyo it Bureau of Fire Protection (BFP) ro mga residente, partikular ro mga naga-istar sa nabukid nga parte nga magbulig agud nga malikawan ro pagtuhaw it grassfire makaron nga tiempo it tag-init.
Raya ro ginpahayag ni FO1 Joana Marie Fernando, arson investigator it BFP-Nabas kasunod it natabu nga grassfire ko hapon it Martes, Abril 29 sa parte it runway strip it Godofredo P. Ramos Airport maeapit sa arrival area nga sakop it Brgy. Union, Nabas.
Dapat suno kana nga likawan ro pagsuga it anuman nga basura partikular ro mga maea nga dahon, indi basta-basta nga magpilak it mga upos it sigarilyo, plastic bottle ag iba pang basura.
Ginpaathag pa it BFP nga haeos kaabuan it mga nagakatabu nga grassfire hay tuga it mga aktibidad it tawo.
Madumduman nga nagtuhaw ro grass fire bandang alas-2:30 it hapon it Martes sa nasambit nga lugar.
Suno kay FO1 Fernando nga unang rumesponde sa sunog ro BFP-Malay, kasunod ro pag-abot it andang mga personnel ag firetruck it BFP-Ibajay.
Kapin sa sang ektarya ro naapektuhan sa nasambit nga sunog.
Bandang alas-3:16 it hapon hay gindeklara ro fire out.
Sa pag-usisa, nadiskubre nga may pilang gintapas nga cogon ag iba pang kahoy ro nakatambak sa lugar nga naging rason it madasig nga pagkalhit it kaeayo dugang pa ro mabaskog nga huyop it hangin.
Samtang, nagdeklara suno kana ro safety security emergency service office it paeuparan it zero damage bangud nga owa man it nahalitan sa sunog mag-eowas eamang nga pila sa andang flights ro naapektuhan .
