KALIBO, Aklan — Kasado eon ro deployment it Bureau of Fire Protection (BFP) sa selebrasyon it fiesta minatay umpisa makaron nga adlaw hasta hin-aga nga adlaw it Sabado.
Suno kay FO2 Mark Alvin Patricio, tagapaghambae it BFP-Aklan nga preparado eon ro andang linyada kon siin nasa red alert status makaron ro ahensya sa idaeom it “Oplan Kaluluwa 2019”.
Ginpahayag dugang nga naka-pokus makaron ro deployment it mga personnel it 10 municipal fire station sa mga sementeryo sa andang lugar nga ginaeauman nga pagadagsaon it maabong tawo agud nga makabisita sa andang mga namatay nga himata.
May kaangtanan kara, nagpadumdom sa publiko si FO2 Patricio nga antes aywanan ro baeay hay sikyaron anay ro mga appliances kon nakahukas sa mga saksakan; i-switch off ro mga safety boxes ag siguraduhon nga nakasarado ro liquified petroleum gas (LPG) sa kusina agud nga makalikaw sa sunog.
Samtang, mas makapamayad suno kana kon saesaeon ro pagabutangan it kandila agud nga kon matunaw hay inde eon magatuga it kaeayo ag inde magsindi sa mga tago nga lugar.
