KALIBO, Aklan—Pormal eon nga gin-umpisahan it Bureau of Fire Protection (BFP) ro Fire Prevention Month pinaagi sa motorcade it mga fire truck ag firefighters nga nagatau it pagpadumdum sa publiko nga mag-dahan sa sunog.
Suno kay Chief Inspector Patricio Collado, acting Provincial Fire Marshall nga ro kick-off ceremony it Fire Prevention Month hay gin-umpisahan nanda sa sangka motorcade sa banwa it kalibo ag pagkatapos hay nagpatigayon it misa sa St. John the Baptist Cathedral.
Ro tema makaron nga dag-on it nasambit nga okasyon hay ‘Sa Pag-iwas sa Sunog, Hindi Ka Nag-iisa!.’
Dugang pa ni Collado nga tuyo it aktibidad nga pabaskugon ro fire safety awareness campaign it publiko ag madugangan pa ro andang kasayuran agud nga maging madahan ag malikawan ro sunog.
Sa gahum it Presidential Proclamation No. 115-A, ag Proclamation No. 360, ginapatigayon kada buean it marso ro ‘Fire Prevention Month’ bangud nga kaeabanan sa raya nga buean hay may mga nagatuhaw nga sunog.
Samtang, ginpahayag pa ni Collado nga sa makaron hay ginatinguhaan nanda nga makaangkon eon it fire station ro banwa it Madalag ag Lezo.
Amat-amat eon man suno kana nga nakaangkon it improvement sa mga kagamitan it BFP sa bilog nga nasyon pinaagi sa pagtinguha it gobyermo.
