KALIBO, Aklan—Igapaidaeum sa paramedics and anti-terrorism training ro mga miyembro it Boracay Fire, Rescue and Ambulance Volunteer Incorporated (BFRAV).
Pagapangunahan raya it British Trauma Training Team nga nauna eon nga nagbisita sa isla it Boracay ko nagtaliwan nga adlaw bilang kaparte it promisa it Embahada it Britanya sa Maynila.
Suno kay Rod Bachillier it BFRAV nga owa pa naisapinal ro detalye it pagahimuon nga training, apang ginaeauman nga matapos raya sa buean it Pebrero it masunod nga dag-on.
Panigurado suno kana nga igaturo man sa training ro angot sa trauma care.
Kaibahan sa training ro mga katapo it Philippine Task Force, Joint Task Force Boracay, kapulisan ag iba pang ahensiya it gobyerno.
Ro BFRAV hay sangka pribadong grupo nga nagatau it boluntaryong serbisyo sa isla.
