KALIBO, Aklan —- Nagapahaum eon ro Boracay Inter-Agency Task Force (BIATF) sa pagpanguna it Department of Environment and Natural Resources (DENR) sa pagturn-over it pagdumaea sa Isla it Boracay sa lokal nga gobyerno it Malay .
Madumduman nga ro BIATF hay ginhimo ni Pangueong Rodrigo Duterte pinaagi sa Executive Order ukon EO 53 ko Mayo 8, 2018 agud nga dumaeahan ro Isla kamana man ro rehabilitasyon ag paglimpyo kara.
Ro termino it BIATF hay nagtapos ko Setyembre 14, 2021, apang raya hay ginpaeawig pa hasta sa Hunyo 30, 2022, pinaagi sa gahum it EO 147.
Kasunod sa pagtapos it andang mandato sa isla, nakataeanang igaturn-over it BIATF ro pagdumaea sa Boracay sa LGU-Malay.
Sa sangka pahayag , ginpabutyag ni DENR Acting Secretary Jim Sampulna nga kabay nga mapadayun ag ma-mintina it LGU-Malay ro gin-umpisahan nga rehabilitasyon sa isla .
Nauna eon nga ginkumpirma ni Boracay Inter-Agency Rehabilitation and Management Group (BIARMG) General Manager Martin Jose Despi nga nagapabilin nga eowas nga paligsan ro baybay it Boracay matapos nga pasado sa gihapon ro standard fecal coliform level nga 100 most probable number per 100 milliliters.
