KALIBO, Aklan–Owa pa nakapaguwa it go signal ro Boracay Inter-Agency Task Force para sa plano nga pagbaton it domestic ag foreign tourists sa isla it Boracay.
Nasayuran nga ro ginapasugtan pa eamang nga makabakasyon makaron sa isla hay ro mga turista nga naghalin sa Western Visayas.
Nauna kara, nagpirma sanday Aklan Governor Florencio Miraflores ag Malay Mayor Frolibar Bautista it sangka joint resolution No. 2020-01 nga nagahinyu sa BIATF nga eowason ro travel ag tourism industry halin sa mabahoe nga pagkalugi.
Samtang, kumpiyansa ro mga negosyante sa isla nga magiging eowas ro pagbukas it Boracay sa mga dumueuong nga turista basta nga sundon ro health protocols nga ginpaguwa it Inter-Agency Task Force for the Management of Emerging Infectious Diseases.
Gin engganyo it mga apektadong stakeholders ro provincial government nga tun-an ro travel bubbles sa tunga it Boracay ag mga kaiping nga nasyon nga may manaba ukon owa eon it kaso it coronavirus disease 2019 o covid-19.
Nagpatigayon it dayalogo ro mga stakeholders, local government units, residente, ag mga displaced workers ko nagtaliwan nga Agosto 15 nga nagasuporta sa ginaduso nga pagbukas it Boracay sa turismo umpisa sa Oktubre 1.
Pabor man ro kaabuan nga grupo it mga negosyante nga pasugtan nga makasueod ro mga taga South Korea, China ukon Taiwan nga nagapanguna sa tourist arrivals ko nagtaliwan nga mga dinag-on.
