Ginpahayag ni United States (US) President Joe Biden nga ro pagkamatay ni Hezbollah leader Hassan Nasrallah hay sangka “measure of justice” para sa mga biktima sa idaeom it anang pagpamuno, mangin sibilyang amerikano man, Israelis ag Lebanese.
Sambilog sigon si Nasrallah sa mga lider nga pumatay it ginatos nga American citizens sa sueod it ap-at nga dekada nga liderato kara.
Paathag pa ni Biden, nag-ugat sigong ro pagkamatay it Hezbollah leader bangod sa gin umpisahan nga pag atake it Iran kontra Israel ko Oktubre 7 it nagtaliwannga denag-on nga imaw man nga naging pagbukas it ginatawag ni Nasrallah nga “northern front” kontra Israel.
Dugang pa kara nga ginasuportahan sigon it Estados Unidos ro mga naging aksyon it Israel kunta sa Iran nga dipensa eang man kara para sa mahimo nga pag-ugatan pa it mas maabong numero it posibleng mamatay ag masakit sa Israel.
Samtang siniguro man ni Biden nga ro ginahangad eamang nanda hay agod nga mapahagan hagan ro natabo nga giyera sa tunga it daywang ka nasyon sa pamaagi it “diplomatic means”.
Ginpabaskog eon man sigon ro paghimo it pagmeeting it pilang ka mga nasyon kaibahan ro United Nations Security Council agod nga maitaeana eon ro ceasefire ag pagbuhi sa mga hostages nga buyot it Iran ag Israel.
Nauna eon kara, nga ginmando man ni Biden sa Secretary of Defense it US nga mas striktuhan ag dugangan ro mga naka-deploy nga military personnels sa Middle East regions agod nga maiwasan ro mga mahimo nga agresibong pag atake ag mapunggan man ro naga lala nga regional ag territorial disputes sa rehiyon.
