KALIBO, AKLAN— Bukon eamang it sa bahin it Metro Manila ro posibilidad nga makaangkon it “Big One”.
Suno kay Provincial Disaster Risk Reduction and Management Council (PDRRMC) Executive Officer Galo Ibardolaza nga pwede raya nga matabo sa Aklan bangud sa West Panay fault.
Apang, indi sigon masayuran kun san-o ag kun anong oras matabo bangud sa owa it maka-determina kara kapareho it pag-forecast engkaso nga may paaeabuton nga bagyo.
Nasayuran nga ro West Panay Fault hay masyadong maeapit sa boundary it Aklan sa Antique, Iloilo ag Capiz ag ro pinakapunta hay sa Anini-e, Antique rason nga madali rayang mabatyagan sa Aklan engkaso nga may mabahoe nga paghueag it eugta.
Gin hayag pa kara nga 23 kilometros eamang ro distansiya it Kalibo sa pinakamaeapit nga West Panay Fault.
Nasayuran dugang nga ku 1948 hay may natabong mabahoe nga linog nga nailista sa kasaysayan it kalibotan nga nagresulta sa pagkasamad it kampanaryo it Jaro Cathedral sa Iloilo.
Samtang, ro linog sigon nga natabo ku 1990 hay nagresulta man sa pagkasamad it Kalibo Cathedral ag simbahan sa Libacao kamana man nga maabong panimaeay ro nagkasaeamad.
Mas makapamayad suno pa kay Ibardolaza nga naga hueag ro eugta it mahinay kaysa nagkatueog it mabuhay nga paniempuhon bangud paga eauman kara ro mabaskog nga pag uyog.
Gin hayag man ni Ibardolaza nga maabo pang blind fault ro owa natumod bangud sa masayuran eamang raya sa oras nga may matabong paglinog.
Gin laygay man kara nga sa oras it makarondaya nga kalamidad masami sigon nga dumdumon ro gina himo sa mga earthquake drills particular eon ro duck cover and hold.
