KALIBO, Aklan—Arestado ro sangka bigtime drug pusher sa ginpatigayon nga drug buy-bust operation it pulisya bandang alas-7:40 kabie sa Purok 4, Brgy. Laguinbanua, Ibajay.
Ginkilaea ni Plt. Col. Frensy Andrade it Provincial Drug Enforcement Unit ukon PDEU-Aklan ro suspek nga si Melquiadez Gomez, 61-anyos, tumandok it Surigao Del Sur apang presenteng naga-istar sa nasambit nga lugar.
Narekober kay Gomez ro sangka plastic sachet it suspected shabu kabaylo it P25,000 pesos nga buy-bust money.
Samtang, sa ginpatigayon nga body search it mga otoridad, narekober dugang ro pitong bulto pa it suspected shabu nga nagabalor it kapin sa P200,000 pesos.
Sa pag-usisa it mga otoridad sa suspek, gin-ako kara ro krimen apang ginpabutyag nga ginpadeliver eamang kana raya it babaye halin iya sa banwa it Kalibo paadto sa Ibajay kabaylo it P2,500 nga suhoe.
Ginpahayag dugang nga agahon sigon napasaalima it suspek ro droga ag kahapon eamang raya nag-umpisa sa nasambit nga ilegal nga aktibidad.
Si Gomez hay presenteng una eon sa kustudiya it pulisya ag nakataeanang magapangatubang it kasong pag-eabag sa Republic Act 9165 ukon Comprehensive Dangerous Drugs Act of 2002.
