Makasamit ro mga motorista it bigtime rollback sa presyo it produktong petrolyo makaron nga adlaw it martes.
Masobra sa P6 ro gin-naba sa kada litro it diesel ag masobra man sa P5 sa gasolina.
Nauna eon nga ginkumpirma it Department of Energy (DOE) ro mabahoe nga pagnaba.
Ginasugid nga ro mabahoe nga rollback hay bangud sa pagnaba it global demand angot sa padayun nga nagakatabu nga lockdown sa Shanghai, China, mag-eowas pa ro interest rate hikes sa nagkaeain-eain nga nasyon kaibahan ro United Kingdom ag Estados Unidos, eakip pa ro pangkalibutanon nga recession nga posibleng magtuga it ‘demand destruction’.
Bangud sa mabahoe nga bawas sa presyo it petrolyo, maskin nga nalipay apang may halo raya nga pagkabaeaka sa mga motorista.
Kaeabanan eon sigon raya nga nagakatabu nga matsa ginapabatyag eang sa publiko ro mabahoe nga bawas sa presyo, apang ginasundan man it bigtime nga pagtaas.
Kabisado eon it mga motorista ro makarondaya nga hitabu.
Indi pa masiguro kon hasta hin-uno ro makarondaya nga pagtaas ag pagnaba it presyo it produktong petrolyo.
Ro temporaryong pagsuspinde sa fuel tax ro andang hinyu sa gobyerno agud nga sangkiri nga mapaugan ro andang kabudlay sa owa it untat nga oil price hike nga medyu malabo man nga mapasugtan.
Temporaryong i-enjoy anay ro panibag-ong bigtime rollback maskin nga pilang adlaw eang, ro importante maskin paalin hay mapuslan ro pagnaba.
