KALIBO, Aklan — Bangud sa pagkansela sa sikat nga LaBoracay sa Mayo, gina eauman it lokal nga gobyerno it Aklan nga bilyones pisos ro maduea maghalin sa industriya it turismo.
Suno kay Aklan Governor Florencio Miraflores ro tikang hay kasunod it rekomendasyon it inter-agency task force nga gina eakipan it tourism, interior and environment departments nga ipasara ro isla sa tanan nga mga local ag foreign tourists umpisa sa Abril 26 nga maga buhay it an-um nga buean.
Ro LaBoracay hay sambilog sa mga gina abangan nga waea-tuong beach party sa isla kun siin naga abot sa haeos 40,000 nga mga turista ro nakikisadya sa Labor Day holiday nga naga hakot man it sangkaterbang basura.
Ku nagtaliwan nga dag-un, kumita it haeos P21 billion ro Boracay sa unang ap-at nga buean bangud sa pagbuhos it mga turista para sa Semana Santa, summer vacation ag LaBoracay.
Samtang, gin pahayag pa ni Miraflores nga magapadayun ro andang gina himong paglimpiyo sa drainage ag sewage system kamana man sa daeagan it trapiko ag basura katuwang rp mga stakeholders, mapasara man ukon indi ro isla.
Amat-amat sigo nandang gina pasarado ro mga establisimento komersiyal nga nakitaan it illegal connections nga nagapagowa it mahigkung tubi sa drainage nga nagiging rason it polusyon sa beachfront sa Bulabog area sa likod nga porsyon it isla.
Gin pahayag dugang kara nga magatapos eonman ro sambilog pang sewerage treatment plant sa Manocmanoc sa Abril 5 nga magakonekta sa Balabag STP it Boracay Island Water Company.
