KALIBO, Aklan—Ginkumpirma ni Police Senior Master Sergeant Eric Lachica it Numancia Police Station nga may nagpa-blotter sa andang taeatapan nga 16-anyos nga estudyanteng eaeaki kaibahan ro anang ina kon siin ginaalegar kara nga ginpunduhan imaw it puti nga van ag ginhana imaw nga pasakyon.
Apang, sa pagreview it cctv footage suno kay P/SMSgt.Lachica maeapit sa sangka establisyimento, negatibo nga may nakit-an nga may puting van nga nagpundo sa anang tungod.
Ginaalegar dugang it tagreklamo nga sangka tawo eamang ro nagpaeapit kana ag ro sa sueod it behikulo hay mga nakakaeo nga mga eaeaki.
Ginklaro ni P/SMSgt. Lachica nga uwa pa sanda makaron it matumod nga lead kon minatuod ro alegasyon it estudyante bangud sa makapilang beses nanda nga pagreview sa cctv footage hay uwa gid it nakit-an nga may nagpundo kana nga van.
Apang, ro insidente suno kana hay padayon pa nandang ginaimbestigahan.
Samtang, ginlaygayan it pulisya ro mga ginikanan nga inde nanda pagpasugtan nga magguwa ukon mag-uli it hanagob ro andang mga onga para sa andang kaeowasan.
nasayuran nga nagkalhit eon sa social media site partikular sa facebook ro nasambitang insidente kon siin nagta-o it alarma sa publiko.
