KALIBO, Aklan — Padayon nga gina-obserbahan sa provincial hospital ro sangka 17-anyos nga binatilyo matapos nga haeab-an kahapon it hapon sa Brgy. Gibon, Nabas, Aklan.
Arestado ag presenteng nakakulong eon ro suspek nga si Daniel Tresballes, 26, residente man it nasambit nga lugar.
Base sa imbestigasyon it Nabas PNP nga natabu ro insidente samtang nakikipag-inuman ro biktima sa anang mga kabarkada nga kon sa siin gina-alegar nga unang nakursunadahan it suspek ro kaibahan it binatilyo nga si Greg Flojo matapos raya nga nag-agto sa baybay.
Bangud kara, nagsugid si Flojo sa anang mga kaibahan nga insigida man nga rumesbak ag nakaangkon it mainitang diskusyon nga nagresulta sa pagbo-oe it sanduko ni Tresballes nga gin-eabu sa binatilyo.
Sa pagresponde it mga pulis hay naaresto ro suspek ag narekober man ro sanduko nga gingamit sa krimen.
Sa makaron hay ginapahaum eon ro nagakaigo nga kaso nga igapasaka kontra sa suspek.
