KALIBO, Aklan – – – Patay ro sangka binatilyo matapos nga maeomos sa baybayong sakop it Brgy. Songcolan, Batan.
Suno kay PCInsp. Zacarias Rose it Batan PNP, ginkilaea ro biktima kay John Loyd Santillan, 15-anyos ag residente it Brgy. Lupit sa nasambitang banwa.
Base sa andang inisyal nga imbestigasyon, bandang alas-4:30 it hapon kat natabo ro insidente kon siin sa andang pagresponde kaibahan ro emergency response team, nasapwan ro binatilyo nga uwa eon it kabuhi matapos ro pilang minutos nga pag-inusoy kana.
Nauna eon sigon kara nga kaibahan it biktima ro anang ama kat temprano pa eamang apang nagpabilin raya kaibahan ro anang mga barkada.
Nagsaeampitan nga magpaligos nga una sa idaeom ko impluwensya it makahi-eilong nga ilimnon kon siin nataeopangdan eon lang sigon it anang barkada nga nagapangayo raya it tabang samtang una sa madaeom nga bahin it baybayon.
May kaangtanan kara, insigidang nagpangayo it bulig sa mga tawo sa lugar ro anang barkada ag ko ulihi nasapwan ro biktima nga uwa eon it kabuhi makataliwan ro masobra sa 30 minutos nga pag-inusoy kana.
