KALIBO, Aklan — Nagapadayon ro biodiversity mapping it Department of Environment and Natural Resources (DENR) agud makapaguwa it administrative order sa pagpatindog it 750 ektarya it critical habitat para sa mga nagapameligrong species sa isla it Boracay.
Suno kay Compliant Association of Boracay (CAB) Vice President Boyet Sacdalan kasunod raya it andang apela sa Boracay inter-agency task force nga inde eubusang pag-ibawae ro diving ag iba pang water sports activities sa isla nga sambilog sigon sa mga atraksyon ag pangabuhian it mga taga-Boracay ag banwa it Malay.
Katuyuan sigon it DENR nga mapangalagaan ag ma-conserve ro forests ag coastal marine areas kapin eon sa Barangay Balabag ag Yapak nga makabig nga ilistaran it mga paniki, pawikan ag mga corals.
Ro pagbutang it critical habitat hay base sa Republic Act 9147 ukon Wildlife Resources Conservation and Protection Act.
Ro pag-istudyo hay ginapangunahan it Biodiversity Management Bureau kabulig ro asosasyon it diving group sa Boracay.
Samtang, ginpahayag ni Sacdalan nga ginkalipay nanda ro pagbilog it CAB nga ginakaeakipan it mga compliant establishments bangud permi eon sandang ginaimbitahan sa mga pueong it task force ag ginabueo ro andang opinion.
