KALIBO, Aklan—Sa pihak nga naapektuhan it Coronavirus Disease pandemic ro industriya it turismo partikular sa isla it Boracay, natigayon nga naeampasan it Bureau of Internal Revenue ukon BIR-Aklan ro andang target collection sa bilog nga distrito it Aklan ko dag-on 2020.
Suno kay Assistant Revenue District Officer Marilyn Tardaguela it BIR-Aklan nga nakaangkon sanda it over-goal matapos nga magsobra it 279 milyon pesos ro andang koleksyon.
Ro andang target tax collection sigon ko 2020 hay masobra sa 1.8 bilyon pesos kumpara sa andang total goal nga 1.54 bilyon pesos eamang.
Bangud kara, nagapabilin suno kana nga sambilog sa mga billionaire province ro aklan pag-abot sa tax collection.
Gindugang pa kara nga ro nagnaba nanda nga koleksyon hay naghalin sa value added tax ag percentage tax halin sa mga buwis nga ginakolekta sa mga negosyo, apang owa naapektuhan ro income taxes.
Ginpahayag dugang nga nakapataas sa andang koleksyon ro bayad halin sa mga transfer of properties ukon real estate nga transaksyon partikular ro naghalin sa sangka mabahoe nga kompaniya rason nga maabot ro target ag nakaangkon pa it surplus.
Nasayuran ro andang target collection ko 2019 hay haeos 2 bilyon pesos ag ginpanabaan raya makaron nga dag-on bangud sa pandemya.
Sa pihak nga parte, haeos nagnaba it 70% ro tourist arrivals sa boracay ko 2019 kumpara makaron nga 2020.
Halin sa 2 milyon nga arrivals ko 2019 hay naging 590 milyon raya ko 2020 rason nga nagnaba man it haeos 100 milyon pesos ro kita sa nailistang 10 milyon pesos eamang ko nagtaliwan nga dag-on.
Angot kara, ginpasaeamatan it ahensiya ro kooperasyon it mga taxpayers ag katapo it media bangud sa andang bulig rason nga naeampasan ro andang target collection.
