KALIBO, Aklan — Mas pa nga ginpabaskog it Bureau of Internal Revenue (BIR) ro pagpatuman it Nationwide Oplan Kandado 2026 bilang kaparte it kampanya kontra sa mga negosyong owa nagasunod sa mga regulasyon sa pagbayad it buwis.
Suno kay Bernardino Semira Jr., Revenue Officer it BIR-Aklan nga sa nasambit nga operasyon sambilog nga establisimento ro nasampolan sa banwa it Kalibo.
Tatlong taxpayers sigon ro ginpaidaeum sa surveillance sa Aklan umpisa ko buean it Abril it makaron nga dag-on, apang sambilog ro owa nakasunod sa ginpadaea nga limang adlaw nga VAT compliance notice .
Ginpatigayon sigon ro dueueungan nga operasyon sa nagkaeain-eain nga parte it nasyon nga gin monitor halin sa National Command Center it BIR Revenue Region 7A sa Quezon City.
Ginpaathag ni Semira nga ro pagpasarado it negosyo hay ukihing tikang eamang matapos mataw-an ro mga taxpayer it bastante nga kahigayunan agud nga itama ro andang mga pageabag ag makasunod sa andang obligasyon sa buwis.
Duagng pa nga hugut sigon nanda nga ginabantayan ro mga negosyo agud nga masiguro ro andang tamang pagpa-rehistro, pag-isyu it resibo ukon invoice, pagsumite it mga kinahangeanon nga tax returns, ag tamang pagbayad it buwis sandig sa ginapatuman nga laye.
