KALIBO, Aklan — Nagapabilin nga normal ro biyahe it mga Ceres liner nga may rotang Iloilo-Kalibo-vice versa.
Raya ro ginkumpirma ni Reynaldo Barrientos , dispatcher it Vallacar Transit sa banwa it Kalibo.
Kadungan kara, ginduea nana ro pagkabaeaka it publiko nga maapektuhan ro andang operasyon bangud sa tensyon nga nagapatunga sa sueod it Yanson Group of Bus Companies, ro nagapanag-iya it Vallacar Transit bangud sa owa pagka-ilintindihan it magmaeanghud nga Yanson.
Ginasugid nga nagalitik ro ueo it mga empleyado it kompaniya kon sin-o ro pagakilaeahon nga presidente .
Apang suno kay Barrientos nga ginasunod eamang nanda ro andang operations manager sa anuman nga mga instruction kara .
Nasayuran dugang nga nagaplano ro mga empleyado it kompaniya nga magpatigayon it transport strike bangud sa owa natao nga mga ginapangayo nga benepisyo .
Apang ginhinyu it bag-ong presidente nga si Roy Yanson nga indi anay raya pagpadayunon bangud nga indi raya makatau it solusyon sa problema nga dapat hay nasolbar eon it dating management .
Gindugang pa ni Barrientos nga kapin sa 30 ro biyahe it andang mga buses paagto sa Kalibo sa sueod it sang adlaw, apang raya hay nakadepende sa kaabuon it pasahero .
