KALIBO, Aklan—Bangud sa mabaskog nga habagat daea it naga-eksister nga Bagyong Gardo ag super typhoon Henry nga nasip-eatan sa extreme northern part it Philippine Area of Responsibility, temporaryong ginsaylo ro biyahe it mga motorbanca nga paagto it Boracay halin sa Caticlan jetty port to Cagban Port sa Tabon Port to Tambisaan Port vice versa epektibo alas-3:00 kahapon it hapon, Agosto 31, 2022.
Raya ro ginpahayag ni Coast Guard Senior Chief Petty Officer Dominador Salvino it PCG-Aklan.
Sa pihak kara, ginklaru ni Salvino nga padayun gihapon ro biyahe it Ro-Ro vessels paagto sa Batangas ag Mindoro port, kamana man nga owa it kanselasyon it biyahe sa mga passenger ag cargo boat paagto sa Romblon.
Maskin nga indi direktang maka-apekto ro nasambit nga mga weather disturbance, ginpasiguro it PCG-Aklan nga padayun ro andang monitoring sa mga kaeawran nga sakop it andang area of responsibility.
Engkaso nga makaangkon it mga mabaskog nga pagbugso, pagaeauman sigon ro pagpaguwa nanda it suspension order ukon temporaryong pagpapundo sa operasyon it mga saeakyang pandagat mag-eowas kon may igapapanaog nga storm signal.
Padayun man ro nagkaein-eain nga water sports activities nga pwedeng ma-enjoy it mga turista.
Apela man nana sa mga turista nga magpamati sa guidelines it mga natungdan agud nga malikawan ro anuman nga aberya ag aksidente.
