KALIBO, Aklan—Nagapabilin nga maeanghay ro pagbiyahe it mga tricycle paadto it Kalibo-Numancia vice versa.
Raya hay sa pihak nga ginpasugtan eon ro 100% seating capacity sa mga pampublikong saeakyan matapos nga ginpaidaeom sa Alert level 1 ukon New Normal ro probinsya it Aklan.
Suno kay Ronel Herimilla, tricycle driver it Numancia TODA nga nagapabilin nga sangkiri ro numero it mga pasahero kung siin apektado man ro andang adlawan nga kita.
Sambilog pa sa gina-antus it kapareho nana nga mga driver hay ro masyadong mahae nga gasolina tuga it padayun nga pagtinaas it presyo it produktong petrolyo.
Ginpahayag dugang nga nagapabilin sa ap-at ka mga pasahero ro andang ginasakay kung siin ro pamasahe hay tig P20.
Nagaeaum man si Herimilla nga mapasugtan eon it gobyerno ro uman nga pagbalik it face-to-face classes agud nga maskin paalin hay makabangon man sanda halin sa maeapnagon nga epekto it pandemya.
Gin-insister pa kara nga dapat makaangkon eon it solusyon ro gobyerno agud nga makontrol ro pagtinaas it petrolyo.
