KALIBO, Aklan–Balik eon sa normal ro vessel trip paagto ag halin sa Caticlan jetty port umpisa alas-5:00 it aga-aga kaina it agahon it Sabado, Disyembre 18.
Ro kumpirmasyon ni Jackielou Ang, chief master it Philippine Coast Guard ukon PCG-Aklan hay matapos nga ginbo-oe eon ro tropical cyclone wind signal sa aklan matapos ro pagpanaeasa it bagyong Odette.
Suno kana nga umpisa kaina it aga-aga hay nakabalik eon ro mga biyahe it roro vessel halin sa caticlan paagto it batangas, Mindoro ag Romblon.
Mag-eowas kara, nagbalik-biyahe eon man ro mga unit it Caticlan-Boracay Tranport Multi-purpose Cooperative ukon CBTMPC halin sa isla it boracay patabok sa mainland malay ag vice versa.
Angot kara, uman nga gin abisuhan it PCG-aklan ro tanan nga mga pasahero nga padayun nga sundon ro health, safety, ag travel protocolcs agud nga malikawan ro pagkalhit it covid 19 eabi pa ag nakasueod eon suno kana sa Pilipinas ro Omicron variant.
Madumduman nga nauna eon nga ginsuspinde ro sea travels sa aklan umpisa ko Huwebes bangud sa bagyong Odette.
Samtang, owa man sigon sanda it nabalitang maritime incident angot sa bagyo bangud sa pagpakita it kooperasyon it mga pumueuyu.
Sa pihak nga parte, bangud sa nagapadayun nga repair it pantalan sa caticlan rason nga nakakaangkon it delay sa loading ag unloading it mga cargoes ag mga pasahero eabi eon kon low tide.
