KALIBO, Aklan — Normal eon it uman ro biyahe it mga sakayang pandagat paagto sa isla it Boracay.
Suno sa Philippine Coast Guard (PCG)-Caticlan, alas-2:00 it hapon kahapon kat pasugtan nga makabiyahe ro mga sakayang pandagat matapos nga humina ro Bagyong Urduja.
Bangud kara, owa eon it namonitor nga mga stranded nga pasahero sa Cagban ag Caticlan jetty port.
Kahapon it agahon hay linibong mga turista ag pasahero ro stranded sa daywang pantalan bangud sa pagkansela sa Boracay trips.
Humupa man ro hasta sa hawak nga baha sa Station 3 sa Boracay kamana man sa D’Mall sa isla nga masaming gina agtunan it mga turista.
Medyu narumpag man ro pilang parte it eugta sa front beach sa Boracay nga gin kaalarma it mga residente.
Presentang naga padayun ro clearing operation sa rockslide ag landslide sa bahin it Brgy. Gibon at Tulingon, Nabas.
Sa kasagsagan it pagbaha kahapon, sangka mabahoe nga sawa ro nadakpan it mga residente sa Alimbo Baybay, Nabas.
Samtang, gin paidaeum eon sa state of calamity ro banwa it Buruanga bangud sa lampas tawong baha sa 12 sa 15 barangay.
Hasta sa makaron hay naga pabilin nga sa mga evacuation center ro 60 pamilya ukon haeos 250 katawong gin evacuate.
Naka-eksperyensiya man it total blackout sa nasambitang banwa.
Sa mayad nga swerte, owa man it nailistang casualties sa pagpanaeasa it bagyo.
