Sangka owa ginpangaeanan nga babaye sa Colombia ro ginadayaw makaron bangud nga napabagsak nana ro most wanted criminal sa andang lugar sa Cienaga de Oro sa Cordoba.
Ro nasambit nga babaye hay bukon it miyembro it kapulisan kundi sangka nabiyudang misis nga gusto eamang nga baeusan ro pumatay sa anang mister!
Si Ruben Dario Viloria Barrios hay negosyante sa Cienaga de Oro.
Apang sa likod it pagiging relihiyoso ag respetadong negosyante, imaw hay sangka notoryus nga drug lord sa Colombia nga may alyas nga “Juancho”.
Maabu eon imaw nga ginpapatay agud nga owa it makasayod sa anang mga ilegal nga hilimuon.
Sambilog eon kara ro mister it babaye nga gintago sa pangaean nga “Maria”.
Matapos nga magpangasubo ni Maria sa pagkaduea it anang mister, gin umpisahan nana nga sudlon ro kalibutan ni Juancho.
Bangud nga gwapa si Maria, madasig nana nga naakit ro drug lord ag gintau kana ro bilog nga pagsalig kara.
Umpisa pa ko 2020 hay ginadudahan eon it mga pulis nga may mga ilegal nga negosyo si Juancho apang owa sanda it ebidensiya agud nga raya hay dakpon.
Sa bulig ni Maria nga nakatipon it bastanteng mga ebidensya, nakapasaka sanda it kaso kontra kana.
Ko Pebrero 11, sa bulig it tip nga gintau ni Maria, gin-aresto it Special Operations Group of the Colombia National Police si Juancho kaibahan ro iba pang kriminal sa Monteira.
Sa makaron, posibleng magapabilin si Juancho it maabu nga dinag-on sa presuhan .
