KALIBO, AKLAN — Patay eon kat masapwan ro sangka biyuda sa sueod mismo it anang panimaeay kaina it agahon.
Ro biktima hay gin kilaeang si Aracely Villanueva, 62 anyos ag residente it Brgy. Polocate, Banga, Aklan.
Base sa report, nadiskubre it mga kaeapitbaeay ro bangkay it biktima matapos nga agtunan nanda raya matapos nga adlaw eon hay owa sa gihapon raya nakagowa it baeay.
Bumalandra kanda ro owa it eambong nga bangkay ni Villanueva kamana man nga naga buea eon ro bibig kara.
Gina patihan nga posibling inatake it anang sakit ro biktima sa oras nga maga paligos eon konta.
Gina sugid nga ulihing nakit-an ro biktima alas-6:00 kabie.
Nasayuran nga naga isaeahanon eon lang sa kabuhi ro biyuda bangud ro anang mga unga hay naka-base sa Metro Manila kamana man sa probinsiya it Antique.
Sa ngayon hay padayun nga gina imbestigahan it otoridad ro nasambitan nga insidente agud masayuran kun may foul play ro insidente.
