KALIBO, Aklan—May pageaum nga uman nga igabalik ro face-to-face visitations it Bureau of Jail Management and Penology ukon BJMP-Aklan.
Suno kay Jail Inspector Rolyn Malolos, Jail Warden it BJMP-Aklan nga nagahueat eon lang sanda it “go signal” halin sa regional office kon hin-uno raya igabalik.
Umpisa sigon nga tumama ro COVID-19 pandemic sa nasyon ko marso 2020, gin-lockdown ro tanan nga mga jail facilities sa bilog nga nasyon ag owa ginpasugtan nga mabisitahan it andang pamilya ro mga persons deprived of liberty ukon PDLs.
Makaron suno kana nga una eon sa alert level 1 ro aklan hay may posibilidad nga igabalik ro face-to-face visitations apang hugut sa gihapon nga igapatuman ro minimum health protocols.
Gindugang pa ni Jail Inspector Malolos nga haeos 90 porsiyento eon nga tapos ro andang ginpa-renovate nga portion it andang pasilidad nga gintaeana para sa non-contact visiting nga pagapa-aprubahan pa sa inter-agency task force regional office.
Buot hambaeon suno kana nga makita eamang it PDL ro nagabisita kanda apang magabutang it barrier sa tunga nanda.
Gindugang pa nga nagapadayun man ro andang e-dalaw ag e-tawag apang ro pagbisita it personal hay kinahangean nga magasunod sa igataeana nga schedule.
Sa pihak nga parte, haeos bakunado eon man suno kana ro tanan nanda nga PDL ag naga-request eon sanda sa department of health para sa andang booster shots kontra covid 19.
May kabilugan nga 146 nga PDLs ro BJMP aklan kaibahan kara ro waeo nga babaye nga may separado eon nga dorm.
Ro mga bag-ong remit ag nagtambong sa mga court hearing hay ginabutang anay sa separadong selda para sa quarantine antes nga ibutang sa andang natungdan nga mga selda.
