KALIBO,Aklan– Naging negatibo sa illegal nga droga ag mga mataeum nga hinganiban ro ginpatigayon nga sorpresang greyhound operation sa Bureau of Jail Management and Penology ukon BJMP sa Brgy. Nalook, Kalibo.
Ro operasyon hay pinaagi sa gintingub nga pwersa it mga tawuhan it BJMP, Provincial Mobile Force ag Kalibo Municipal Police Station.
Ginkumpirma ni Jail Inspector Rolyn Malolos, jail warden it BJMP-Aklan nga sa ginpatigayon nga paghaeughog it mga awtoridad sa parehong female ag male dormitory hay owa it anuman nga iligal nga drogang nausoy kamana man drug paraphernalia ag iba pang kontrabando.
Tuyo suno kana it mas ginpabaskog nga Oplan Greyhound nga programa it BJMP nga maduea ro presensya it iligal nga droga sa sueod it presuhan.
Kada buean sigon raya nga ginapatigayon ag kada quarter ro drug testing sa mga persons deprived of liberty ukon PDLs kun sa siin ro pinaka-ulihi hay ko buean it Abril.
Samtang, pila sa mga aktibidad nga ginatutukan makaron it BJMP hay ro ginapatigayon nanda nga sports fest nga nagatuyo nga mas pang mapabaskog ro camaraderie it mga PDLs.
Sa pihak nga parte, malipayon nga ginpaabot ni jail Inspector Malolos nga sambilog sa andang PDL ro nakabo-oe it second place sa ginpatigayon nga BJMP national painting competition leg 3 sa Cebu ko Hunyo 2.
Tatlong rehiyon sigon nga ginaeakipan it Region 6, 7 ag 8 ro nagpadaea it andang mga entries ag maswerteng napilian ro oba it inmate halin sa BJMP-Aklan.
Raya suno kana hay may kaeakip nga cash prize nga nakataeana eon nanda nga pagaboe-on sa regional headquarters.
