KALIBO, Aklan—Haeos 90 porsiyento eon nga preparado ro simbahan it parokya it Our Lady of The Most Holy Rosary sa Barangay Rosario, Malinao sa nakataeanang uman nga pagbisita it replica it imahe it Black Nazarene it Quiapo sa maabot nga Abril 20, 2024.
Suno kay Rev. Fr. Salvador Piad, kora paroko it nasambit nga simbahan nga nakipag-angot eon sanda sa lokal nga gobyerno it malinao ag iba pang natungdan nga ahensiya it gobyerno bangud sa ginaeauman nga uman nga magadagsa ro mga parishioner, mga Kristiyanong Katoliko sa Aklan, eabi eon ro mga may panata ag debosyon sa Black Nazarene.
Raya hay kasunod it owa ginaeauman nga pagbuhos it mga tawo ko nagtaliwan nga dag-on sa unang pagbisita sa Aklan it imahe it Black Nazarene, kun sa siin maabu ro nag-abang sa kilid it karsada ag nagsunod sa motorcade.
Ginpahayag ni Fr. Piad, halin sa Quiapo hay igabiyahe ro Poong Nazareno ag ginaeauman nga magadungka sa Caticlan Jetty Port bandang alas-10 it agahon sa Sabado ag magapatigayon it motorcade paagto sa andang parokya.
Makaangkon man sigon sanda it welcome mass bandang alas-5 it hapon nga pagapangunahan ni Fr. Douglas Badong it Quiapo Church ag farewell mass man sa pagbalik kara sa Caticlan.
Magapatigayon man it grand procession, misa ag youth presentation kaibahan ro ginatawag nga “pahalik” sa imahe it Black Nazarene.
Madumduman nga ko nagtaliwan nga dag-on hay inabot it mahabang oras antes nga natapos ro “pahalik” bangud sa kaabuon it mga deboto nga nagharu sa eambong it Black Nazarene ag nagpahid it andang mga panyo sa krus nga pas-an it Itom nga Nazareno.
Pagadaehon man ro imahe sa St. Isidore the Farmer Church sa banwa it Lezo sa Abril 21 antes nga igabalik sa Quiapo Church.
