KALIBO, Aklan—Ginpatigayun ro blessing sa ginpatindog nga bag-ong quarantine facility sa banwa it Banga ko Enero 27.
Gintambungan raya ni Mayor Erlinda Maming kaibahan ro iba pang opisyal halin sa pilang ahensya it gobyerno.
Suno kay Ms. Donnalyn Siyambio, Public Information Officer it Municipal Inter-Agency Task Force nga gin-umpisahan ro konstruksyon it pasilidad ko nagtaliwan nga dag-on.
May una sigon raya nga 14 tanan nga mga kwarto ag tig daywang katre sa kada kwarto kamana man nga fully airconditioned, may television ag kaugalingon nga wifi.
Apang, owa pa sigon it siguradong petsa kun hin-uno raya pormal nga pagabuksan bangud padayun pa ro andang pag-asikado para sa mga ginakinahang-ean nga dokumento.
Mag-eowas kara, kinahang-ean pa sigon raya nga ipaidaeom sa pag-inspeksyon it Department of Health ag mataw-an it permit.
Nagaeum si Siyambio nga maging operational eon ro pasilidad sa masunod nga mga adlaw agud nga magamit eon it mga pasyenteng nagpositibo sa COVID-19.
Nasayuran nga may 42 pa nga aktibong kaso it sakit ro banwa it Banga nga ginakaeakipan it pito nga naka-facility quarantined, 29 nga naka-home quarantined ag an-om nga admitted sa ospital.
Sa kabilugan, naga-abot eon sa 1,270 ro nailistang kaso it munisipalidad umpisa nga magtuhaw ro pandemya.
Sa nasambit nga numero, 1,198 eon ro nagmayad matapos nga magpaidaeom sa pagbueong ag quarantine procedure samtang 30 eon ro death toll.
