KALIBO, Aklan — Mabahoe nga bulig ro Dugong Bombo 2026 na may temang “A Little Pain, A Life To Gain,” agud nga masiguro nga makaangkon it bastante nga suplay it dugo para sa mga pasyenteng nagakinahangean kara.
Suno kay Christeli Villarias, Blood Donation Recruitment Officer it RHU-Kalibo, importante ro dere-deretso nga blood donation agud nga mapabilin ro suplay it dugo, eabi pa ag mas mataas ro demand makaron kumpara sa numero it mga donor.
Sa makaron suno kana hay mabudlay eon nga maka-usoy it suplay it nagkaeain-eain nga blood type bangud nga sangkiri ro naga donar.
Kaeakip sigon sa mga nagakinahangean it dugo hay ro mga dialysis patient, pasyenteng nagapadaideum sa caesarean section, mga biktima it aksidente ag iba pa.
Samtang, ginpaathag ni Villarias nga ginadaea pa sa Roxas City, Capiz ro mga nakolektang dugo para sa processing bago ibalik bilang stock it Philippine Red Cross (PRC).
Gin engganyo man nana ro publiko nga mas mayad nga magtau it replacement donation sa baylo nga magsalig sa pagbo-oe it dugo nga may processing fee nga ₱2,100 kada bag.
Tuyo kara nga mabayluhan ro nagagamit nga suplay ag malikawan ro pagkaubos it stock sa blood bank.
Samtang, may programa sigon nga Blood Samaritan ro LGU-Kalibo nga nagasabat sa processing fee, apang raya hay para eamang sa mga residente it Kalibo nga nagakinahangean it dugo.
Ro LGU Kalibo hay may una man sigon nga bloodletting activity kada Sabado sa Philippine Red Cross kun sa siin pwedeng mag-agto idtu ro mga gusto nga mag-donate ag ro mga nagakinahangean it bulig.
Ginpamilit ni Villarias nga sa kada sangka bag it dugo hay pwedeng makabulig nga maka-eowas it hasta sa tatlong kabuhi.
