KALIBO, Aklan–Ginakabig ni Outgoing 1st District board member Soviet Russia Dela Cruz nga sangka prebilihiyo ro anang pagserbisyo sa sueod it tatlong termino sa mga pumueoyong Aklanon.
Si Dela Cruz hay unang nailihir bilang miyembro it provincial board ko 2013.
Sa sueod it siyam nga dag-on nga pagpungko sa pwesto, daywang komitiba eamang ro anang mayor nga ginbuytan.
Ginakaeakipan raya it Committee on Agriculture ag Committee on Education.
Mag-euwas kara, nakaibahan man imaw bilang miyembro sa Committee on Budget, Finance and Appropriation ag Committee on Tourism.
Maeapit sigon sa anang tagipusuon ro daywang komitiba bangud naga-anggid raya sa anang eksperyensya bilang sangka ordinaryong pumueoyo.
Ginpabugae pa kara nga maabu nga mga eskwelahan ro naipatindog sa idaeom it anang pagdumaea sa komitiba it edukasyon.
Suno kay Dela Cruz maabu man nga mga programa ag proyekto ro andang nahimo sa idaeom it pagdumaea ni Governor Florencio Miraflores kaeakip ro food security.
Apang, gin-aku man kara nga naging mabahoe nga hangkat kanda ro pagpanaeasa it COVID-19 pandemic apang owa sigon raya naging sab-eag sa andang tayuyon nga pagserbisyo.
Si Dela Cruz hay nagserbi man bilang konsehal it Kalibo sa sueod it daywang termino.
