Board member Tejada, ginpaabot ro owa pagpabor sa planong 10% nga surcharge it Akelco sa mga electric bill nga mapas-eawan nga mabayaran sa tamang oras

KALIBO, Aklan–Sambilog si Aklan 2^nd District Board member Jay Tejada sa mga nagtambong sa ginhiwat nga Annual General Membership Assembly (AGMA) it Aklan Electric Cooperative (Akelco) sa ABL Sports Complex kahapon.

Ginpaabot ni Tejada ro anang owa pagpabor sa ginaduso it Akelco nga makaangkon it 10 percent nga surcharge sa mga bill it kuryente nga indi mabayaran sa tamang oras.

Suno kana, bukon pa it haum ro mga miyembro-konsumidor nga makaangkon it dugang nga baeayran.

Mabahoe sigon ro posibilidad nga indi eon masarangan it mga ordinaryong pumueoyo ro igapatong nga penalidad sa andang monthly bill engkaso nga mapas-eawan sa pagbayad on time.

Dapat sigon nga taw-an anay it hugada ro mga pumueoyo nga maka-rekober halin sa epekto it pandemya ag makabalik sa trabaho antes iduso ro pagpatong it surcharge.

Ginsuhestiyon man kara nga dapat makaangkon it konsultasyon para mabuoe ro sentimiyento it publiko.