Ginpabaskog it Bureau of Customs (BOC) ro pagbantay sa mga pantalan ag border it nasyon sa ginasaligan nga pag-abo it mga ginaimport nga produkto ag balikbayan boxes makaron nga nagahilapit ro kapaskwahan.
Suno kay BOC Commissioner Ariel Nepomuceno, padayon ro andang pagpatuman it mga regulasyon, inspeksyon ag anti-smuggling operations agud masiguro ro maayos nga pagproseso it mga kargamento sa tyempo it dagsa it mga padaea halin sa ibang nasyon.
Kaibahan sa ginatutukan it ahensya ro mga reklamo angot it mga balikbayan box nga uwa nakaabot sa mga dapat makabaton kara.
Padayon sigon ro koordinasyon it BOC sa mga nasyong ginhalinan it maabong padaea it mga Pilipino agud masolusyunan ro mga kumpanyang nagaloko sigon sa mga nagapadaea it balikbayan boxes.
Bangud kara, ginlaygayan ro mga overseas Filipino worker ag iba pang nagapadaea it balikbayan boxes nga siguraduhon nga lehitimo ro andang ginapili nga cargo ukon forwarding company ag taguon ro mga resibo ag dokumento it andang transaksyon.
